Shaphang jong ngi
La seng ha ka snem 1976, Ka Jowai Co-operative Urban Bank Limited kadei kawei na ki co-operative bank ba treikam bha ha Meghalaya
Ka jingbatai lyngkot shaphang ka Jowai Co-operative Urban Bank Ltd
Ïa ka nongrim shaphang ka jingbuh ia ka bank hapoh ka rukom treikam jong ka co-operative la sdang naduh ka snem 1976 bad kane kadei namar ka jingiohi jngai jong ki katto katne ki khraw pyrtkhat, ba kynthup ia i ,Bah J. D. Pohrmen bam kwai ha dwar u Blei, I Bah Nihon Ksih bam kwai ha dwar u Blei, I Bah H. W. War bam kwai ha dwar u Blei, Bah H. E. Pohshna bam kwai ha dwar u Blei, Bah W. Laloo, Bah Noli Tariang, I R. Chyne bam kwai ha dwar u Blei, Bah R. Passah, Bah B. P. Sen Gupta, Bah L. P. Nongpluh, Bah G. Das Chowdry, Bah Pro Lyngdoh, I H. R. Kyndiah bam kwai ha dwar u Blei, Bah N.E Kamar, I H. Roy Syngkon bam kwai ha dwar U Blei, I W. A. Pariat bam kwai ha dwar u Blei, Bah Tharsing Pariat, I Skinly Dhar bam kwai ha dwar u Blei, I Bronath Laloo bam kwai ha dwar U Blei, bah W. Sna, bah Horace Sayoo, Bah T. Kyndiah, I Wilbert Laloo bam kwai ha dwar U Blei bad Bah Loverneth Pyrbot.
Kine ki khraw pyrkhat ki la iakynduh lang bad ki la ia mynjur lang bad shim kawei ka rai ban thaw noh da ka Jowai Co-operative Urban Bank Ltd. ha shnong Jowai, kaba long ka Head Quarters jong ka Jaintia Hills District. Ka jingpynrung kyrteng ia kane ka bank la leh lyngba ka ophis jong I Assistant Registrar jong ka Co-operative Societies Jaintia Hills Jowai, bad kumta la thung ia U S. R. Dey. U R. Suchiang Jr. Inspector/Auditor jong ka Co-operative Societies ban iarap ban saindur ia ka Jowai Co-operative Urban Bank katkum ki kyndon jong ka Co-operative Societies Act and Rules ka sorkar Meghalaya.
La pynlong ne pyntreikam ia ka Jowai Co-operative Urban Bank katkum ki kyndon jong ka Meghalaya Co-operative Societies Act and Rules ha ka jingialang (inauguration) kaba la long ha ka 14 tarik u Rymphang 1976. Da ka jingiamynjur lang lah rai ban jied ia U Bah J. D. Pohrmen kum u nongpyniaid ia ka jingialang kumta ia ka jingialang plie la pyniaid da ma U.
Ia baroh ki kyndon treikam ne ki Byelaws jong ka Bank la pdiang lang da baroh da ka jingailad ia ka sorkar ba kan thung ia ka kynhun jong ki Board jong ka Bank na ka bynta ka samoi ba 5 snem.
La pynrung kyrteng ia ka Bank ha ka ophis jong u Assistant Registrar of Co-operative Societies Jaintia Hills, Jowai kum ka Co-operative Society ryngkat katto katne ki nongkynti hapoh ka kyrteng "JOWAI CO-OPERATIVE URBAN BANK LTD" bad u Registration No. JWI/5 of 1975 – 76 Dated 26th February 1976.
Ki dkhot jong ka kynhun ba nyngkong ka Board of Directors jong ka Bank ba la thung da ka sorkar:
- J. D. Pohrmen (Chairman)
- H. E. Pohshna, bam kwai ha dwar u Blei (Dkhot )
- Nihon Ksih, bam kwai ha dwar U Blei (Dkhot)
- R. Passah (Dkhot)
- T. Kyndiah (Dkhot)
- R. Chyne, bam kwai ha dwar U Blei (Dkhot)
- Horace Sayoo (Dkhot)
- Managing Director Meghalaya Apex Bank Ltd. Shillong (Dkhot)
- Assistant Registrar of Co-operative Societies Jowai Jaintia Hills (Dkhot)
- Sub Registrar Co-operative Societies Head Office Shillong (Dkhot).
Ka jingialang ba nyngkong eh jong ka Board of Directors la pynlong ha ka 9 tarik U Iaiong 1976 ha ka ophis treikam jong I Chief Executive Member, Jaintia Hills Autonomous District Council Jaintia Hills Jowai, I Bah J. D. Pohrmen iba la pyniaid ruh ia ka jingialang.
Ka Bank ka sdang ban pyniaid ia ki kam baroh naduh ka 10 tarik U Jylliew 1977 (kata shisnem lai bnai hadien ba la dep ban pynrung kyrteng ia ka).
La plie ia ka shnat jong ka Jowai Co-operative Urban Bank ltd. ha Dawki ha ka 17 tarik U Jylliew 1979 hynrei la khang ia kane ka shnat ha ka snem 1982 namar kam iaid ka jingtreikam.
Ha ka snem ba nyngkong jong ka jingtreikam jong ka kata naduh 1975-76 ka jingioh nong jong ka bank ka long (kaba kut ha ka 30.6.76) na ka daw ba la ioh ia ka subsidy ba la ai da ka sorkar. Hadien kata kumba 14 snem kynthih ka Bank ka la ioh mad ia ka jingduh nong. Haba la leh ia ka jingkhein ia ka lut ka sep bad ka ioh ka kot jong ka Bank la shem ba ka don ha ka khim bad ka jingduh nong ruh ka la nang kiew. Ka Reserve Bank jong ka ri India, ha ka snem 1986 ka la phah ia I Asstt. Chief Officer ban wad bniah ia ka long ka man jong ka Bank. Ha kane ka jingwad bniah la lap ba ka Bank ka don ka jingduna ha ka liang ba pisa pilain kumta ka Reserve Bank jong ka India ka la pynpaw ba kane ka Bank kam donlad ban khie im biang. Ki la ai jingmut ruh ba dei ban khang noh ia ka Bank. Hynrei, la ong ruh ba ka lah ban pynkylla ia ka Urban Bank sha ka “Credit Co-operative Society” da kaba pynthymmai biang ia ki kyndon ain jong ka treikam ne Byelaws kiban ia hap.
Ka Bank hadien ba ka la ioh ia kane ka jingtip shaphang kaei ba ka Reserve Bank jong ka India ka lap bad ki jingai jingut jong ka, ka la khot pynlong da ka jingialang jong ka Board of Directors jong ka Jowai Co-operative Urban Bank Ltd. ha ka 3 tarik U Kylla Lyngkot 1987 ha Circuit House Jowai.
U Bah G. Mylliemngap, Myntri ka tnad, ka Meghalaya u la iadonlang ha ka jingialang bad pyniaid ruh ia ka jingialang da ka jingkyrpad jong ka Bank. Ha kane ka jingialang I Myntri ka tnad Co-operation i la bishar sani shaphang ki jinglap bad ki jingai jingmut jong ka Reserve Bank ka India kumta i la pan ia ka jingai jingmut jong ki Director halor kine ki sienjam ban shim halor kaei kaba ka long. U S. K. Sen Managing Director ka Meghalaya Co-operative Apex Bank Ltd. u la ai jingmut ha ka jingialang ba kadei ka jingshisha ba ka long kaba sngewsih haba peit iaka jingtlot ha ka jingdon ka pisa ha ka Urban Bank hynrei wat la katta, u la ai jingmut ba kam long kaba dei ban shu khang noh ia ka Bank namar kane ka lah ban mih shibun ki jingkylli ha kaba iadei bad ka Co-operative bad khamtam ia ka Co-operative Urban Bank. U la pynpaw ruh ba um sngew iahap ban pynkylla ia ka Bank sha ka Thrift co-operative Society ne ka co-operative pisa kaban shu ia pynlang pisa para dkhot. U la ai jingmut ba donkam ban shim ia ki sienjam kiba tikna da ka Board of Directors jong ka Bank ban wanrah ka jingpynkylla dur biang ia ka Bank ha ka por ba la buh ryngkat ka jingiatreilang jong baroh kiba iadon bynta lang. Baroh ki jingai jingmut bad ki jingpyni jong ki Director la bishar sani hadien ka jingiakren kaba janai, la rai ba yn thung da ka Sub-committee ban pynkhreh ia ka "Rehabilitation Scheme" ban peit bad mynjur da ka Board bad ka tnad Co-operative Department.
I chairman, i la kyrpad ia I Managing Director ka M.C.A.B ban shah ia I Bah K. Tang, Branch Manager, ka MCAB Ltd. ba in trei kum I secretary ka Jowai Co-operative Urban Bank haduh ba yn da lah ban thung briew ha ka jaka ba lait hadien ka jingshong thait jong I Bah J. Kyndong iba long I Secretary barim. I Managing Director I la ai ka jingmynjur ba yn shah ban trei shipor bad tang ha ka por ba lait. Kumta la thung ia I Bah K. Tang kum I Secretary ba shipor jong ka Bank. Ki dkhot jong ka Board da ka mynsiem kaba shitrhem bad jingtrei shitom ki la thaw ia ki sienjam treikam ban pynkhie im biang ia ka Bank. Da ka jingpynleit jingmut ba skhem, ka jingduhnong jong ka Bank ka la sdang ban duna bad ka Bank ka iohi nynkong ia ka jingkiew biang ha ka jingioh nong ha ka snem 1990-91 (kaba kut ha ka 30.6.91) da ka jingioh nong kaba long 41,157.00 tyngka. Naduh kata ka por ka Bank ka la sdang ban ioh ia ka jingioh nong.
La ai ia ka jingithuh ne ka Banking Licence da ka Reserve Bank of India ha ka 30 tarik U Nohprah 2009 bad u Licence No. UBD.ASSAM 0006P.
La pynkynriah noh ia ka Bank sha kane ka jaka ba don ka Head Office mynta ha Ladthadlaboh, Jowai ha u snem 2017. Ka bank mynta ka don ar tylli ki shnat treikam, ka Jowai Main Branch ka don ha Iawmusiang kaba long ka shnong pdeng ha Jowai bad kawei pat ka shnat Phramer Branch ka don ha shnong Phramer, West Jaintia Hills District.
Ka Motto jong ka Bank ka long: "KUNE KATNI IA KA MYNRIED MYNKAWI". Ha ka ktien phareng ka long "SAVE TODAY FOR A BETTER TOMORROW".